Үгсийн чуулган

Үгс чуулав
Үндэснийхээ хэлийг аврах талаар
Үндсэрхэг үзлийг өмөөрөх тухай
Үгсийн чуулган эхлэв
Гадаад үгээр чамирхсан нэгнийг
Гацаа болгоё гэж уриа дэвшүүлэв
Гайхамшигт монгол хэлээ аврахын тулд
Ганцхан монголоороо ярихыг уриалав
Би гэж үг босож үг хэлэв
Бидний ирээдүй гэрэлгүй байна гэж хэлэв
Гадаад үг биднийг эзэллээ
Гар хөлийг тушив гэж гомдоллоо
Сайн байна уу гэдэг үг
Санал байна гэж гараа өргөв
"Hi "гэдэг харийн үг
Харин ажлын байрыг минь булаасан гэв
Зөв гэдэг босов
Зөндөө зүйл ярив
Зөвхөн нэгийг нь онцлоход
"Ок" гэдэг гадаад
Орж ирчихээд явахаа байсан гэв
Тийм гэдэг үг
Тэндээс гараа өргөв
Тэмцэх хэрэгтэй гэж уриалав
"Yes'гэсэн гадаад үг
Ер нь дарамтлах болсон гэж ярив
Үг бүхэн үг хэлэхийг хүсэв
Үнэндээ ганцхан зүйл дээр санал нийлэв
Гадаад үгийг зайлуулахаар болов
Гамшгийн хэмжээнд ирчихээд байгааг ухамсарлав
Үг байгаа дээр нь дарж авахгүй бол
Өгүүлбэр болчихвол хүчрэгдэхгүй гэв
Гадаад үгэнд дуртай ам болгоныг
Гарах авиаг нь хорино гэж тохиров
Харийн үгэнд дурласан хүмүүсийг
Харалган ухааныг нээхээр болов
Монголдоо байгаа цагт
Монгол үгээ хэрэглэхгүй байвал
Үг бид тэмцэнэ гэв
Үнэндээ бид
Өөрсдийгөө аварна гэв
Үндэстний дархлаа болсон
Монгол сайхан хэлээ
Монгол сайхан үгээ
Монгол сайхан ахуйгаа
Монгол сайхан орноо
Үг бид хамгаална гэв
Үндэсний хэмжээнд
Харийн үгтэй дайн зарлав
Хамаг бүхнээ дайчлана гэв

Н.Тайванжаргал