Хань минь

Нарны гэгээн доор
Надруу урссан туяа минь
Насны минь амьдралд
Намайг л гэх хань минь

Найман ханатын голомтонд минь
Нар шиг ургасан гэргий минь
Нартын тавиланд минь
Надад заяасан хань минь

Өргөн мөрний эрэг дээрхи
Үзэсгэлэнт сайхан лусын дагина минь
Өнчин ганц сэтгэлд минь
Өглөөний нар шиг өнгөлөг хань минь

Үйл тавилан хоёроос минь
Өрсөж намайг хайрласан хань минь
Үргэлж үнэнчээрээ үлдэх
Үүрдийн сайхан гэргий минь

Эгэл монголын хөдөөгийн буйд
Энгэр газар ургасан цэцэг минь
Энэлэн шаналангийн сүүдэр доороос
Эгнэгт гэрэлтэх гэргий минь

Элбэрлийн цагаан хайран дундаас
Эргэж төрсөн хань минь
Энэ цагийн амьдралаас
Эрт буцахгүй нэг насны хань минь
Н.Тайванжаргал