Тэнгэрийн цэцэг

Хан уулын хэцэд 

Ховор цөөн заяандаа

 Хос хосоороо

 Хорвоог чимэн 

Мөч тоолон өндийж 

Мөнхийн нарнаар тэтгэгдэн

 Дэлбээ нээн цэцэглэдэг

 Дэндүү ховор заяатай

 Савдаг лусын амин цэцэг 

Санчиг буурал хайрханы нүдэн цэцэг 

Тэнд энд хамаагүй ургадаггүй 

Тэр болгон хүнд харагдадгүй 

Тэнгэрлэг нэгэн билэгдэл

 Тэнгэрийн цэцэг вансэмбрүү 

Очирваань хайрханы 

Оргил манхан хярд 

Оройн бүрийд нь

 Од мичидтэй ханьсаж 

Өглөө нартайд нь 

Үүлэн тэнгэрийг түшиж дэлбээлдэг 

Үзсэн нэг нь

 Үзэсгэлэн гоог нь биширдэг 

Дуулсан нэг нь 

Дурлаж сонирхдог 

Дуулгат их хайрхан

 Дуутай тэнгэр хоёрын 

Дунд нь ургадаг тэнгэрийн цэцэг 

Газарт биш тэнгэрт

 Ганцаараа биш хосоороо ургадаг

 Дээд заяатай эрхэмсэг 

Дээр ургадаг тэнгэрийн цэцэг 

Наран тусгалд ойрхон 

Нартын амьдралаас холхон 

Өндөр хайрханы орой руу 

Өгсөж зүтгэж ургадаг

 Өглөө нарыг нь

 Өнгийн цэцгүүдээс түрүүлж хардаг 

Дээд тэнгэрийн дээж цэцэг 

Дээвэр уулын дэлбээ цэцэг

Цэцэг цэцэгсийн дээд цэцэг 

Цэнхэр тэнгэрийн амин цэцэг 

Хаана ч хамаагүй ургадаггүй 

Хань ижлээрээ хоёулаа 

Хөл доор биш 

Хүрч боломгүй оргилд 

Хүн амьтанд үзэгдэлгүй 

Хөх тэнгэрт ургадаг 

Хаан уулын тэнгэрлэг цэцэг

 Ханийн заяатай хайрын цэцэг

 Сэрүүн хангайн энгэрт асаж ургадаг

 Сэвэлзэх салхины тоосонд хүртээлгүй ариун цэцэг

 Энэ гээд хөндөх заяагүй 

Эрхэмсэг цэцэг 

Тэр гээд заах тавилангүй 

Тэнгэрийн цэцэг Вансэмбрүү 

Н.Тайванжаргал :